ബ്ലോഗരുതുകൾ

അധികം ഘനത്തിലാവരുത്
ഒന്ന് നേർപിച്ചെടുക്കണം
ഒറ്റ ഇരുപ്പിൽ തീർക്കാനുള്ളതാണു
ഒറ്റ വീർപിൽ ഇറക്കാനുള്ളതാണു



തൊട്ടു കൂട്ടാൻ
അശ്ലീലം പറിച്ചുവെച്ചത് അച്ചാറിട്ടാൽ മതി
 എരിവും പുളിയും അധകമാവണ്ട
വേണ്ടതെല്ലാം വേണ്ടത്ര ചേർത്ത്
ഉപ്പിലിട്ടെടുത്താലും മതി
മേമ്പൊടിക്ക് അല്പം ഫലിതമാവാം


 ഇരുണ്ട നേരൊന്നും ഇടയിൽ കലരരുത്
നല്ലോണം തെളിഞ്ഞിരിക്കണം
പലസ്തീൻ,  യെരുശലേം,  രജസ്വല,
കന്യാചർമം,വിരാട്കോലി തുടങ്ങിയ ചേരുവകൾ
വേവാതെ കിടക്കുന്നതിൽ
വെറിട്ടു കിടക്കുന്നതിൽ വിരോധമില്ല



അധികമാവരുത്
അരപ്പേജിൽ പൊതിഞ്ഞെടുക്കാൻ പറ്റണം
ഞങ്ങൾക്ക് പലേടത്തും പോവാനുള്ളതാണു
നിന്റെ കല്യാണത്തിനു
വിളിച്ചിട്ട് വന്നവരല്ലല്ലൊ ഞങ്ങൾ?